Ongi etorri
Ongi etorri Izarra Herri Eskolara!
Urkabustaizko bihotzean aurkituko gaituzu -Izarran hain zuzen ere- eta oinarrizko hezkuntzako bi etapa nagusiak eskaintzen ditugu bertan; Haur Hezkuntza eta Lehen Hezkuntza. Ikasleen garapen integrala sustatzen duen hurbileko hezkuntza, inklusiboa eta euskalduna da gurea. Natura eta tokiko komunitatea funtsezkoak dira eguneroko ikaskuntzan, baita metodologia aktiboak, lan kooperatiboa eta bizikidetza ere.
Herrian errotutako eskola da gurea: txikia eta hurbilekoa eta pertsona guztiek elkar ezagutu eta zaintzen dugu. Landa-ingurunean dagoenez, harreman estua sustatzen da familiekin eta herriarekin berarekin. Hurbiltasun horrek arreta indibidualizatuagoa ahalbidetzen du, ikasle bakoitzaren erritmoa eta beharrak errespetatuz. Elkarrekin eta elkarrengandik ikasten dugun komunitatea gara.
Euskara da hizkuntza nagusia ikastetxeko irakaskuntzan: honen erabilera modu naturalean sustatzen dugu, bai ikasgelan, bai bizikidetza uneetan; hizkuntzarekiko eta euskal kulturarekiko jarrera positiboak bultzatuz. Gure helburua haurrek euskara normaltasunez, maitasunez eta konfiantzaz bizitzea da, egungo hizkuntza-errealitatearekin konprometitutako pertsona eleaniztunak prestatuz.
Elkarrenganako errespetua, inklusioa eta enpatia sustatzen dira eguneroko lanaren funtsezko zutabe gisa. Ikasleek elkarrekin bizitzen ikasten dute, identitate bakoitza aitortua eta baloratua den ingurune batean. Eskolak aktiboki lan egiten du komunitate kohesionatu, ireki eta solidarioa eraikitzeko.
